حَبِيس تفكيري وِوجداني وِمن حَولي جِدار
وسقف يِحجب عَن عيوني رُؤيةَ الكون الفسيح
والوضع مِن خَلف الجُدر بَاروت يِتفجر وِنَار
والناس صَارت كَالأفاعي كُلها تِصدر فَحيح
نظرة تأمل لَا أمامي وِلتفاته وِٱنكسار
وٱحساس وَاسَاني وآخَر سَابني خَلفه جَريح
وحَان مِن بعدَ التأمل وَقت فِيه آخذ قَرار
إما ٱستعد ٱنهض وإلا ٱبقى مِعَ حُزني طَريح
عَقلي لَه السُلطة هُو الآمر وِله حَق الخَيار
وٱيضاً هُو النَاصح وِيا نِعم المِشَاوِر وَالنصيح
أرقى بِتفكيري وبالتفكير نِجتاز الحِصار
ومَن تُوخَى الحِذر يسلم وٱن تعلق مَا يِطيح
وٱحذر مِن الحسرة وِمِن قَتل الأمَل والانهيار
كُثر النَدم ما ينفع ٱبن آدام وَلَا همه يِزيح
بالعقل والحكمة وبالتدبير نِكبَر عَالكِبَار
وبالتمني والنَدم والحُزن نِهوي للضريح
أخذ الحوادث الأمور المستجدة بٱقتدار
كَلا ولا يِمكن يِزول العقل مِن هَزه وِريح
واليأس مثل الليل لَكنَّ الأمل مِثل النهار
والعقل الأسلم حيث مَا الجسم السَليم المُستريح