ياحبة حلاوة
يا حبة هموم
يافاس ياط وريه ياضربة قادوم
ياترس معصلج فى شد الهدوم
الوطن دا، ولا؟ فراغ محموم
ساندين كتافنا زق والفضا معدوم
الظلم على بختنا قالم عليه مظلوم
دا من خيبتنا ولا عمايل وقاعدالنا
حطت وطاويط القلق العتمة قدامنا
لبستونا طرح وحلئان فى وداننا
أتخدعنا فى بعض وف أصل معدنا
نسايم الحرية مش قادرة ع الكتمة
حكمت علينا لتفضل ع النفس حاكمه
إيدين تشب لفوق وإيدين تقوم هادمه
دبح الغريب حلمنا فى الهوجة والعتمة
شق فى عروق الضماير.. لقاله مخرج
والخزى من فجرنا مابقاش بيعرج
ملضوم فى عار الوطن ياخزى الرجال
ياحسرة اللى أتعشموا فيكى يبنوا أمال
حضن الأمان بينتفض م البرد والرعشة
ونا اللى هاموت من شدة الدهشة
حكموا عليك ياوطن بالفرقة والغيبوبة
كل الصفات أنهارت والمُثل بقت معيوبة
مالناش كبير ولا هانعرف نشترى
طول ماكل واحد على روحه بيفترى
عار وأتوصم ع الأوطان جذور ومنبته
الكراسى ماسألتش الناس دى ليه متبته
يكونوش فاكرينا كراكيب على حبة أسبتا
ولا عشان أحنا مالناش قاعدة ومتثبته؟
هتطربونا بغناكوا فى حب مصر بالشكل دا
ياجاهلين جروحى ماتكسروش دراعى للعدا
دراعى وكرامتى محتاجهم وقت الفدا