آه يامصر آه..
آه لو تقدرى
تملى الكون آهات وصريخ
آه لو تقدرى ع الزعيق
وتندهى لأبنك م الغريق
البحر واقف والبر واقف
حتى حال العبأد واقف مابيمشيش
اتعلمتى م التاريخ ولا اتعلمتيش
الفقرا تزعق فيكى ولا تسمعيش
آه يامصر آه..
آه لو تقدرى
طعن الخسيس علامه فى ضهرهم
غلبتيهم أكتر ماأتغلبوا على أمرهم
المر شرب المر من مرهم
آه يامصر آه..
آه لو تقدرى
الأولية فيكى مابيتعلموش من بعض
الكل بيسن نابه لجل أما ينزل عض
ولحم الغلابة يملا أسواقهم
واللى تحسبه، يطلع أسوأهم
على إيده كل السنين سوده
الخارجة من إيديه مولوده
سنين ضاعت وسنين مفقوده
وأنا اللى أحبك تصرخى..
وتعلى صوتك من صرختك ماتخافيش
أسهرى على أمنك وماتناميش
خدى أبنك فى حضنك ولا تقلقيش
ماتفرقيش شعب من جيش
وماتنسيش وأنت بتطلقى صرختك
بالمخاض والحلم
تخرجى على كل الناس بنهار وليد
وضحكة صافية منورة
واقطعى الأيدين اللى تشدك لورا
واللسان اللى أتعود على النأوره
آه يامصر آه..
آه لو تقدرى
تبصى لأدام وما تبصيش لورا