برغم إنك جوه منى
وبرغم إنى جوه مِنك
لكن حدود تفصل ما بينّا
فى منتهاها سكتك
وسكتى هى محاور قصتك
يوم نبتدى ...يوم ننتهى
يوم تنورها مابينّا ضحكتك
والعيون كانت تملّى أسئلة
والأجوبة ...
ترسم خطاوى للجنون
والجنون قلبى انا
اللى عاشق سوسنة
وسط الصحارى
قلبى شارى
اسم كيف البسملة
يا أسئلة يا مقفلة
جّوايا كل الأجوبة
ولما تيجى تفتحى
ليا الإجابة وتسمحى
يبقى السؤال هو السؤال
والإجابة هى العدم
ماكنش لازم تسكنينى
أو أسكنك ...
لاهيّه كانت يوم طريقى
أو مسكنك ...
ماكنش لازم تجرحينى
كل ليلة ألف مرة
ماكنش لازم تجعلى
كل الليالى عليا مٌرّة
وأنا اللى عاشقك
فوق جبين الأرض
توهه ..
وإنتى معايا معذبانى
بعيدة عنى مخليانى
حى ... ميت
يا مسكنانى كل ليلة
جوه منك
تاهت خطاكى من سنين
وخطايا دوّبها الحنين
ياهلترى ...
السكة ليها منتهى
ولاّ انتهى ...
مشوارنا جوه الأسئلة .