كنت أدور.. كنت أقول
وما لقيت إلا
الحروف
تنبت ف صحرا
القصيد
كل ألوان الشجرْ
والقلوب اللي
هجرها
من زمن
نبض المعاني
ما لقت إلا
على حروف القوافي
كل
صواريها
تُمرْ
يا مواني حيرتي
لا تسكنيني
بالهموم والحزن
يكفي ياللي
بداخلي
يوقد حشاي
ويستعرْ
كنت أدور عن صديق
يسكنه نبض الوفا
وما لقيته!
ما بقى للناس
في الدنيا وفا
وما بقى لك يا الوفا
غير أوراق وحبر
شفت في الدنيا الهوايل
ما تصدق لو أقولْ
يعتريك مليون شكل
من الذهولْ
لمّا تعرف
كيف ها الدنيا تمرْ
كيف يلونها
القهرْ
وكيف ترسمها الخيانة
والنذالة
والغدرْ
واللي ظنيته في يوم
إنه من خير البشر
تصدمك منه الخديعة
لمّنْ استأمنتْ طرفه
وما توخيت الحذر
ما بقى للناس في الدنيا وفا
وما بقى لك يا الوفا
غير أوراق
وحبر
آه من غدر الزمان
لا تقلب في المواجع
لا تخلي الحرف
ينطق
والنبض
ينزف ألم
صار كل الكون
يمشي للورا
لا اتعجب!
احنا بي
اللي نظن الدنيا
ما تسوى ولا
تراب
القدم
كلها الدنيا مصالح
والفضيلة
ع الرفوف
من يقرب صوبها
أو يجرب لمسها
تنزف جروحه
ندم
من يقول الأرض
يسكنها بشر!
كانوا في يوم بشر
بس هذا اليوم
تسكنهم شياطين
الرقم
كل شي محسوب
فيها بالقلم
الرجولة
الشهامة
الأمانة والخيانة
والوطن
كل شي.. يا للحسافة
فيها محسوب بثمن!
لا تتعب في الحساب
جملة الدنيا بما فيها
عبارة عن
إسم
وين مكتوب الإسم؟
في البنوك
وفي العقار
في التجارة
في السهم!
من عدم جينا
لها الدنيا
نعمر أرضها
والنهاية
ما لنا إلا
العدم