ما بلا ش
الجد مش هيريحك
والرد ممكن ينفخك وتطير
والصدق ممكن يفتحك سرداب
توصل لأخرك تلتقيك أمشير
ويهب ريح الشك من جواك
يطلع هواك
من بين ضلوعك يستجير
تصبح أسير ذاتك وأناتك تخونك
يتحنى لونك من صدى الفيضان
تصبح حيطان محتاحه للتغفيق
ما أقدرش أقول لك أى شيئ
علشان مافيش
ولا أى شئ تقدر عليه
هتقول لى ليه
الرد باين للعما
تقدر تقف وتشد حيلك للسما؟
تقدر تبوح وسط الجروح المؤلمه؟
تقدر تدور وسط أنفاسك عليك؟
وعينيك تشوفك بالقوى
ما تقولش آه
عمرك وراه
سكاكين شراقى
طالعه له من كل إتجاه
وعشان تعيش جوه الحياه
خليك همام
وأملا المقام كرامات
هِز السُكات
واجمع شتات تارك
ما تسيبش أخبارك
تحلف بإنك عديم
ما تعييبش ع النِكله
ولاحتى ع المليم
لو رفضو يستاهلوك
لويوم بقيت ورده
بتبوس إيدين الشوك
أو يوم بقيت مملوك
لقوالب الصلصال
وقت إنفصال العزيمه
تلقى الهزيمه طين
وف كل عين بركان
واصل عنان جوفك
وإن تهت ف ظروفك
تلقى الآسى مواويل
والليل يطول حواليك
تقفل عينيك وتغيب
وف وسط كوم كراكيب
تدارى م المعيَّره
كرباج ورَّا
وعشان تخطى ع الوجع
من غير ما تتعب أو تقع
خليك جدع
وإياك تبيع اللى اشترى
وإن كنت خايف ع اللسان
ليموت جعان
سيب الكلام يطلع له ريش
وماتنحنيش
لوحتى قضيتها ف طُرى
كرباج ورَّا
وإن كنت مش عارف تعيش
وسط البشر
شمَّر ضميرك بالقوى
خللى زمانك يستوى
على نار رضاك
واضرب وراك كرباج ورَّا