من هاجس ماهو على كل أبو حال
يجود المهنا على ماتمنا
مرات ابد مثل الجويد من الأقفال
صفاة لو حاولت منا ومنا
عصاي لو تشرط له الحرف بريال
ولا تهوزه بالشطير المحنا
وان قلت لك قال الذي قال ما قال
ولا هو بقايل... واقصر الشر عنا
والناقد الذاتي على طول شغال
اقشر من احساس الزعول المطنا
إن شاف جرة واحدٍ مر لا طال
عيا لو أن اللي شحنهم شحنا
ومرات لا والله يجي من سعة بال
متفضلٍ لو ما طلبناه حنا
والشعر له معنى ومبنى ومدخال
ودافع ظروف وواسه يتسنا
وان صدرن منا صدوقات وجزال
ورد لرفيع الذايقة وارفعنا