كنت يوم وحدي فالدار
محتار بين اوراقي واقلامي
جالي يبلغ لي لخبار
ويقولي نوض زيد قدامي
جمعت افكاري وصغتها صور
ورتبتها ابيات امامي
وطلقت لعنان لخيالي
رتبت صورةقدام صورة
ورجعت بالذاكرةلقريب الزمان
شفت فاس ما وخضورة
وملحون والة وعذب الالحان
ورياض ومنزه ومقصورة
ومسايد وجوامعوعذب الاذان
وبراح يبرح بصوت عالي
يقول يا اهل فاس يا وجوه الخير
عندي من دريبة لبشارة ليكوم خبار
سطع ليوم نجم مطرب كبير
فارس لغنا وامير لوتار ولنغام
اسمو عبد الوهاب الدكالي
وبدع وبرع الفنان الموهوب
وسحر بغناه لرواح ولقلوب
عبر احسن تعبير علوطنية
بالعهد ويا بلادي وعيد المسؤولية
وشموع ورحلةالنصر وغير وغير
فنان الشعب تكنى بحبيب الجماهير
محبة فالمغرب والملك الغالي
ومشى فنانا فطريقو بنجاح
بذكاء وتخطيط كيف المعتاد
غنى للصحراوي والصانع والفلاح
واكد نحاح مكانتو بين الرواد
وجات تجرينة شريط الحياة كفاح
ورمال من ذهب وايام شهرزاد
نرجعو ثاني للباقي حديث
ونوليو للطرب تاني النيت
بشهادة العلج ولمغاري والعلمي والحداني
والطانجاوي والمفتي والباتولي والتلباني
كتعجبني وديني معاكوما انا الابشر
وبيا ولا بيك والغربة ولهلا يزيد اكثر
مرسول الحب وعيني ميزاني ومشى غزالي
هذا كلو لمحة ومزال المسار
مطرب جيلنا كبار وصغار
فنان كان ومزال صرح ومنارة
سفير فن بلادو ونعم السفارة
لي نوى يتاكد عندي ليمارة
كان يام كان واغنية الحضارة
وسوق البشرية اللحن المستقبلي
واليوم وغدا الى ماشاء الله مازال البريق
ولا زال موضع الاحترام والتقدير والتصفيق
ايلا بالكلمة اليوم فتكريمو خديت السبق
نتمنى ما زال الماجي بعدي يلحق
نقول ونعيد مرات بكل افتخار
حييو معاي الاستاذ الموسيقار
المحبوب ديالكوم وديالي