شارد المعنى حبارى والقرايح بندقيه
المعالي نجم عالي ماتطوله ا منيات
الشعر بن السوالف والقصايد شاذليه
الزمن بنت عفيف وصادق الموعد عباة
كل ماذعذع هوى الغربي على نجد العذيه
ولع النسيان ناره من رماد الذكريات
اتذكر يوم ناحت فوق غصني راعبيه
قلت لي مات الضمير ولاسألتك كيف مات
كان ياما كان حبك كان مامثله وزيه
كان علقمك ومرارك في فمي سكر نبات
كنت من طيبي اعدّه كل ماهو لك ليه
كنت لامنّي عطيتك مانتظرك تقول:هات
وان يمينك صافحتني صار قلبي هو يديه
صرت مدري هي يمينك او يمين الذاريات
خابره قلبي حظوظه فالهوى دايم رديه
خابره لاقال: روحي ياهموم الوقت جات
وانت شيل الجرح عرضه ثم شيله سامريه
دام لك هم سمين ولك ضلوع ناحلات
لاهو انت اللي تصبك فالمعاليق برديه
ولاهو انت اللي تبللّ بالعطش ريق الفلاة
من متى وفّى سرابك موعده يالمهمهيه
من متى كانت هدوم الذنب سجادة صلاة؟
لاتقول شوي فيها هو بعد باقي شويه
بين دربك والنهايه كلّها حذفة عصاة
عاد تدري حطّها كل العيوب السبع فيه
ماخبرت انه يضر السلخ بعد الذبح شاة
لااني لااول ولااخر من تنكر له خويه
والله ادري مير هوني يالجروح الكايدات