وليه نحرق في أعصابنا
وهيا مقضياها نوم
لا حست يوم بإيه صابنا
ولا داقت جراحنا ف يوم
وتتقلب على الجنبين
مع دا شمال لو كان المزاج عالي
ومع دا يمين لو كان الدينار غالي
دي مش فاكره إيه عملنا علشانها
ودفعنا كام لجل نعلي من شانها
وتايهه
يوم مع واحد يدروشها
ويوم تاني
مع واحد يروشنها
وهي معاه بتتصور
صور خادشه
ياستي الحاجه ياروشه
أنا وحدي اللي ربتيه ورباكي
أنا وحدي اللي فاتح قلبي ليكي قبل شباكي
أنا الحلواني اللي اتحدى كل المُر وبناكي
وحلاكي
وانا وحدي اللي بكتيه ليلاتي دم
وعمره ماليله بكاكي
أنا ف الهلس طبالك
وانا في الجد قوالك
وموالك
أنا اللي باقيلك الباقي من ايامك
أنا الراسم لأحلامك
وباعلنها لآخر مره قدامك
أنا سيدك
وخدامك
وبين الدقن والعسكر
حبستي كل أحلامك
خلاصة القول
لادول ولا دول
هايوصلوا يوم لأرحامك
نوفمبر