لنا الله يا سحر الهوى لو ملكت اقلوب !
مع كل نبضه كنّك الآمر الناهي !
تهبهب بريح الشوق و انفاسك اللاهوب !
أنا لاثنيت اوسادتي جيتني راهي !
أعيش ابخيالي واعتنق لهفتي وآجوب
أفتش دفاتر ذكرياتي معك ساهي !
تذوب المشاعر و اعتلي نشوتي وآذوب
مثل ما يذوب الغند فــ بيالة الشاهي !
من الشوق عصفور الأماني يرفرف صوب
شبابيك حجرتها و عذر الولع ناهي !
يبا يسرق النظره من الراس للعرقوب !
و يرجع يتمتم لي نبا حسنها الباهي !
ألملم ملامح طيفها و اجمعه بأسلوب !
على شان لامر الوله قلت له : كاهي !
عزاي اتحلّم و التحف حظي المنكوب !
و اصدّق عيوني لو كذب حلمي الواهي !
على وين ؟! مدري .. والسنين ارصفه و ادروب !!
اقلّب خطاوي غربتي بالوله لاهي !
أذوب بــ دروبي ودي اصرخ و اشق ّ الثوب
أحاول ولكن صرختي ترفض اشفاهي !
خف الله يا وجه الهجر ما كفاك اشحوب
كسرت المرايا و السبب وجهك الفاهي !
لك اعوام امرّك مغفره و امتليك اذنوب
تهقويت عذرك ينتشي و اثرك تضاهي !!
تفج ّ الحنايا فج .. و تقول لي : مكتوب !
بقي تشلع المعلوق و توصي الطاهي !