صدر الردي لا ضاق بي خلّه يضيق
ما همني ضيق الصدور السقيمة
فعل الردى لوله بالأسواق تسويق
محال يعطيه الفطين أي قيمه
لا يخدعك ديكور حطوّه تلفيق
بيعود لأصله مثل عودة حليمة
يا كم صبرت وقلت لعلّه يفيق
راع التطاول بالخطأ والشتيمة
وامرر الزلات من دون تدقيق
وأقول زلّه من عقولٍ غشيمه
من كان يحسبني على الرد ما طيق
والله لأسوقه مثل سوق البهيمة
ولقمّه حنضل يذوقه على الريق
حتى يخلي سيرته مستقيمه
ولا ابني الكلمة على غير توثيق
ولا تبلا الناس زور وظليمه
والعاصفة ما حركت قمَة طويق
القمّه اللى في سماها مقيمه
حذّرت صناع الدجل والخثاريق
عن كل كذبه عاقبتها وخيمه
قالوا مسوى له علاقة وتنسيق
وقالوا خيانه والخيانة جريمة
واليوم بان أهل الحيل والخرابيق
وكلٍ فعوله في جبينه وسيمه
وبانوا اللى ينكرون المواثيق
والكذب والتلفيق عاده قديمه
من عادته نقل النمايم وتفريق
وزرع الظعينة واختراع الخصيمة
والصدق عادتنا نقوله وتطبيق
لوكان مضمون الحقايق أليمه
ما عندنا للعلم تغريب تشريق
والمشي سيده والنوايا سليمه