ما يقدر الضيق ينصب لي مراسيمه
ما تقدر النار تلحقني محارقها
وانتي نسيج المطر والورد والغيمة
اللي يلوذ الجفاف بنوض بارقها
قلبٍ يصب الحديث بمسمعي ديمة
وشمسٍ تغار الليالي من مشارقها
وروحٍ بالاحلام والواقع لها قيمة
في مهجتي ما تلوح الا بيارقها
اناملٍ لو خذت بالعزف تقسيمة
تلقى الوله طرقها والحب طارقها
انتي زلال العطا والريمة الريمة
اللي تلوك الحزن دمعة مفارقها
يغار منها النخل والطلح والنيمة
لا اخضرّت اوراقها وازهت مطارقها
غرورها لحن في صدري وترنيمة
وبحورها حيّها يشهد لغارقها
واهدابها في نقاب العز والشيمة
في عين من شافها توضح مزارقها
واحساسها من شراب الطيب تسنيمة
لا رتبت نبض قلبي في نمارقها
تغيب والحزن في قلبي مجاهيمه
واحسّني من هجوس البال سارقها
ويحن صدر الحجاز لبارق الغيمة
ويجف لا فارقت عينه وفارقها