الشعر دمع وذنب وجروح وهموم
الشعر صوتٍ لا فقدتك كتبني
شفني ثلاث شهور مرت الى اليوم
مقدر اقول الا فراقك غلبني
والنوم وين النوم..؟؟ يا حارس النوم
وسهر الليالي لجل عينك نهبني
والكاهل اللي بانت بطوله وسوم
كلٍ على الرفقه بحاله طلبني
ما ابكي علشانك ولا ابكيك مظلوم
ابكي على يومٍ تركتك نكبني
علمتني كيف الشقا يلبس هدوم
وعلمتهم وشلون ذكرك سلبني
لا مر طاري كيف انا آطيح وآقوم
حبك على سوق المنايا جلبني
ياليت غيري باع واقدر انا آسوم
لو ان مثلك لا انهدم شي يبني
ادري خسرتك بس حاصل ومقسوم
هذا البخت في شوف غيرك وهبني
خلصت والا باقيٍ عندي علوم
وآآلله مدري بس جرحك عطبني
والشعر هذا الشعر ضيقات وهموم
حتى اليا من طحت بعدك كتبني