قالوا: مراتي ليه نكدية
قلت: يا ناس هيه نقية
قلبها أبيض وزى الفل
واسعة وبارحه وليها تكية
قالوا:عجيبة مِرات الشاطر
قالعه براسها وعامله قناطر
واللي يشوفها يتوه فالخاطر
حرمه يا رب وليها شنبات
قلت: كفاية
ورحت أدندن وألف رحاية
عارف إن اللف حكاية
جايز تطحن وتخر دقيق
وجايز ما تطحن ولا حباية
وأدي الحكاية:
أصل مراتي يا ناس عصبية
قط منفر من العصرية
عامله ضوافر تهبش بيهم
وإن ضحكتلي غاوية أذية
أصل مرأتي جحيم مستورد
لما بتصحى نورها يورد
واللي لابسها جن مصور
ساكن راسها وباني حجرات
لما أروح بعد غيابي
أكتم نفسي وأعد حاجاتي
وأرسم بسمة عشان أبسطها
وأفرغ جيبي من عملاتي
أغمض عيني وأمكن أعدي
وأرفع راية لسيدنا الأفندي
وإن بصتلي أطاطي براسي
جايز تغضب وتكسر باسي
وتزلني لسابع أرض
وانزل ساكت قدام ولدي
وأخد علقة تقصر أجلي
وامسك دمعي وأخاف يجري
وأضحك ضحكة بسني وتغري
أدي مراتي
يجي الليل وأفضل أعوذ
أقرى الفاتحة وآية الكرسي
وأدعي المولى أنه يأخدها
قبل الصبح ما يجي واشوفها
وأخد نفسي زى الناس
أحط دماغي وأحلم بيها
تبقى مصيبة لو نامت قبلي
تفتح بوقها وطبلها يدوي
معركة دايرة ولها صولجان
انسحاب
أحلم أن إني ركبت حصان
ومسكت لجامه وسبت حمار
قبل ما تصحي أو توعالي
وأخرج سالم من بلاويها
بس مراتي
أم عيالي
فين تروح
ومين يؤيها